是我小時候：吳若希窮寶寶大作戰（2013-08-10蘋果日報）

是我小時候：吳若希窮寶寶大作戰

【８歲】■吳若希在福建出生，對家鄉份外有親切感。

一篇買麵包文章，慨嘆香港貧窮問題，令吳若希贏盡網民讚賞。其實她也感受過窮人的滋味，那時她只有七歲，父親因生意失敗破產，但父母刻意隱瞞家裏巨變，有一晚吳若希看到媽媽躲在房內偷哭，嚇得她即攬着媽媽。

撰文：林妃

【1歲】 ■小時候的吳若希面圓圓肥嘟嘟，有點似男孩。

【2歲】 ■性格開朗的吳若希是開心寶寶，萬千寵愛在一身。

【3歲】 ■父母為吳若希慶祝3歲生日，度過快樂生辰。

【5歲】 ■小時候的吳若希肥肥白白，一點也不似謝安琪。

【11歲】 ■由於爸爸生意失敗，令她從小已學懂積極面對人生。

歌手吳若希（原名吳嘉莉）於福建出生，父親在當地經營酒店，小時候快樂不知愁滋味，她說：「我喺福建長大，細個父母要做嘢，只有爺爺嫲嫲陪我。記得以前最開心係媽咪同我去海灘，有次我同堂姐游水，一個大浪冚過嚟令我浸親，好在堂姐即刻扯起我，但都飲咗幾啖海水。」

屋企破產

本來過得很快樂的吳若希，7歲時卻遭逢人生巨變！吳若希苦笑：「嗰時爸爸因為酒店生意差，迷上咗賭博，後來屋企破產，環境變得好差，當時自己仲好細，唯一記得有晚媽咪匿喺房喊，我即刻呵番佢。」

【18歲】 ■大前年出道的吳若希即與鄭欣宜同獲內地音樂先鋒榜新人獎。

【19歲】 ■自言藍色是幸運色的吳若希，曾穿全身藍於近日被嘲大爛地的大球場捧車仔場。

【21歲】 ■身穿吊帶低胸裙的吳若希，今年五月在工作中度過21歲生日。

爸爸生意失敗後，10歲的吳若希跟着家人來港生活，她說：「初時好唔慣，成日喊，好在自己適應能力算高，好快追到香港功課，同啲同學嘅關係都幾好，不過因為廣東話唔正，有時會俾同學笑，但自己唔怕醜，問番佢哋點講。」性格開朗的吳若希，學懂更積極面對人生，她說：「我想搵多啲錢，進步多啲，可以令屋企人生活好啲。」